Tua I gensa Japan Galpi lai mah in fighter (longleng) khat tuahsiat ziak hia, Kaihlam Tang kanlah hia thei khang , kaihlam tang ah ana tualkhiak hi.Huchi bang a na kiak lam a theikha omlou bang in kuamah in kamteh  in leng nei ngeilou uhi. A kiat mukha lou chih dial ah muh lua le uh kilawm, zanlai a kia houh ahia himaithei . Zanlai hilele a gingbek zakha on leh kilawm tuh hi-a..Ahih keilah huailai leh tulai khovel kibang nawn hetlou . Huai lai a mite mawl leh Ukpi(Govt.) zahna lian mahmah a hihziak in a mukha te’n le kuahiam ukpi khutlum thuak khak lauh ziak a imm deuh uh leng hikha in the. Kaihlam khomite’n leng Longleng kia ahihlam theilou bang in hunsawttak om uhi. Amau huai akiak na mun kigalmuh dan a pak vivek pen kawl ding peuh sa maimah in kuamah in awlmoh leh ngeingaih in neilou himhim uhi. Amau ngaihdan in huai lenna sik pakvikvek pen sik hilou in kawlsuang pak vikvek bang sa uh chidan in kigen hi. Huchi ahihleh bang chidan a kitheisuiah ahi ding? Kua hiam gamvak hat khat hia, nih hia, thum hia, theikhang , kidou nung kum 20/30 bang a pailiam nung in, huai kim a ava vakna ah bang hiam sik ahih dan hon thei a huchia a mun a hon etleh lenna kia ana hizenhouh hi. Ava mukha masa te zaw bang hiam a hangsan deuh, pasalpha deuh leh gamvak mi deuh ahi di uh. Huchia siklom ahih dan hong kitheih suah tak in, (kuamah zakdah louh di’n) Bell ah kuang a shun ding khong in va sum sek uh hiding hi. Huchi’n sapkangte Enmginepii en kuangkum bang belpi bang , buhbel, belkuang sin, leh um-le-bel kisuah thei hamham hi… manpha veve, zodawn a teng mimawlte adi;n van apan Manna  hong kia bang hial hi. Akigen dan in huai lenna kiakna mun ah mihing luguh leh guh-le-tang saupipi, keumahmahta kimu lepluap a, sana hoih mahmah khat, huai le ana pailai leh hinglai kimu chi uhi.

 

Galpi ven zoh in Papi ngalhat deuhdeuh khenkhat te’n camp luih ding chi in, Sepaihte Camp khohna mun leh kikaptuah na mun deuh khong va delh uhi. Tuabang a camp lun deuh dan a kigen tuh I gensa Chikha Camp  khong dan a gen pawl om uhi. Camp luh kichi pen, thagum tha tangh toh vadou leh vasat a luh chihna hi Zenzen lou in camp taisat sa sung a van laktheih om hiam chia va zong leh vavil chihna hizaw, Huchi bang camp luh te’n, van tuamtuam Kettle,nou, sikvan, thautnag , sikkeu, kuang leh booth(Khedap) chihte leh puan bang hon pua sek uhi. A kigen khat mikhat in a Camp luhna a tuibuuk um chia khong a lum khat honla a, inn tun a , a khetkhet leh puak chih bang kigen hi. Amau mawl lua mahmah lai unchin bomb(grenade) ahihlam bang thei selou dan uh hi ding hi. Camp luhte van lak sik vante tuzat hiam hei tuamtuam ding in sek uhi. Mun khenkhat bang ah Rifle leh Thauka (Machine Gun) huaituh tulai pau in Magazine bulh theih pawl mukhia leh khonkha pawl om dan in leng kigen hi.

 

 Tua I thupi gen din tulai in a poimohlou khat suak bang hi.Himahleh mit mahmah a na mu i-pipu te gen akipan laksawn dan in Japan te melput igensawn zual di. Ana mukhate gendan in, Japante eimi mah bang in, mineu ahihhang a hat melmahmah uh. A puan silhte uh leh khedap bulhte uh bang ana engthei mahmah dan uh ahi. Pipute tualpuan ninbimbem toh a muhkhop chiang in, a puansilhte uh leh a kithop dan himhim leh a ki zepna himhim ziak khong in lau in ana zahtak thei mahmah uhi. Ka Papi gen akipan “Amau a khedap uh savun sansim hiuhiau a gongsang leh taw sah biuhbeuh , ka muh in hoihsa petmah in ka eng petmah “  chi hi. Huai lai in eimite;n khedap but gentaklouh kehkol leng tenglou in Pisal te’n tualpuan zaa ana teng dan uh ahi.

 

Koilai adiam ah khat vei Japan te’n eimite kiang ah Gatangh tawi kawm in hiaite bang a zang uh ? chia a dot ua leh ka nek uh ahi chi in dawnna mu uhi. Huchia amau leng a gilkial utoh nektheih ahih ngeitak leh chi in emzok in ne ek giap uhi. Huchia hon nek chiang un bangzah hiam te gui in a sihloh pawl bang om dan in ana kigen hi. Ga sial nek chih thahah, haihuai petpet.!!!.