KHUL LEH I KIMINLOHNA
“Laizom nih-thum, khul a piang teng,
Zota Vontawi, Lia-le-tang te hingei hi’ng e”
Pupa Laa
KHUL BANG AHIDIA:Hon suangtu pi leh pute , KHUL apan potte ahi uh chih akhang khang a kipiak sawn thugousiah ahi. Pi leh pute khul ah ana khosa ngei uh chih leng thudik ahi. Ei khangthu ah khul in dinmun poimohna uangtak nei a , I kipatna I sut chiang in alou theilou in genkhak hi veu hi. Huchi ahih leh KHUL bang ahi dia…. Khul kichi kokhuk ahihkeh leikohawm hiam ,suangkohawm hiam kawlhawm khong genna ahiphot hi. Mi sih chiang in pasal tangzang leh tangval thahat te khul tou leh lai ding in kuan sek uhi. Hiai apan khul kichi misi vuina leihawm, haan genna in leng kizang hi chih muh theih hi. Himahleh tua I gen KHULpen misivuina hilou zaw in pipute tenna leh kibukna kohawm pen ahi. Khul gendan tuamtuam in leng kigen, sinlung bang Chhinlung chipawl leng om hi.
I pipute khul a potte chih in a gennop ahih leh amau khul apan hong piang (biological birth) chihna hizawlou in, Inn leh Lou lam dan leh sak dan a theih ma uh, gam Sahang , Gam Zohngeupi leh gamsa lauhuai pipite toh thuneih kituh a leh kinetuah a gammang a a khosak laiun, a dou uh Sa leh Galte hat peuhmah uh ahih man in, kihumbitna ding, inkuan kepbitna ding, huihsia vuahsia apan bitna din, leihawm, singhawm, suang hawm leh kawlhawm khong ana bel dan ahi uh- huai tuh khul hiam sinlung hiam chhinglung hiam leng a kichi. Huchibang zel in hong khosa ua tu-le-ta hon nei in hong pung ua, a suante uh khul sung khong a piang ahih man un khul a potte kichimai uh hi ding ahi. Ziak bel khul in mihing Ta dia neikhia chih na lam sang hilou zaw in, lei in mihing neikhia theilou himhim ding hi. I lak ua mi khenkhat suidan in huai khul pen India-China-Myanmar gamgi toh kinaih koimun hiam a om ding in gintak na nei pawl om hi.
KHUL LEH EILAWI: Huchi ahih dungzui in eilawi khul a potte I kichi ua, Identity ding leh kiminvohna ( Nomenclature) ding khong in khul chih zang nuam pawl tampi leng hunpaisa leh tulle in leng om hi. Nidang deuh in Khul Union chih bang dinsuah in ana om dan in kigen hi. Banah tulai in leng Sinlung leh Chhinlung min zang a pawl kibawl bang gen ding om zezeuh vele… A tamzaw inbel Khul pen taisanta hi in ka thei hi. KHUL a ki minloh taak taktak na ding ahi diam ??.. Lungsim tawldam takin sut chiatchiat ta leng hiai bang dotna hong piang thei dinmun ahi – Ei pipute kia khul a ana khosa uh leh ana pot uh ahi diam?? Namdang suang tute bang chibang khong a ana khosuak uh ahi ding ?
Nikhat Nepali mikhat zak a , atung a Laa kasak leh maksalua in, anuih bang hong zaa kawi jejen hi. Huchi in ken leng Laathu hoihtaka hilh chian a pipupte khul kichi lei hawm suung (cave) apan a pot ahihdan ka hilh leh, lamdangtak in aman leng kupding hon nei sam hi. Nepali suangtute leng leihawm(cave) a pawt sam uh ahih dan hon hilh hi. Amau kammal in Khul pen Gufa/Ghufa chi uhi. Gufa khong a khosa in Nepali nam ana suang uhi. Aman a genna ah Gufa a pot chih bel in leh lou lam dan a theih ma un kawlhawm, leihawm khong bel in ana khosa uh a huai ziak in Gufa a pawtte kichi uh ahi chi in eilawi ngaihdan toh kibang geih khat hong piang hi. Hiaite ka zak nung kiminlohna dia khul va zat pen dik khinlou deuh ahi deh aw chihna kon neita hi. Chihbel eilawi pipite kia khul a pawt dan a ngaihtheih hilou hi. Nam dang suangtu tampite leng khul a ana khosa ngen uh hidin gintak na hong piang thei mawk bang hi. European, African, leh adang dangte suangtute leng thuksut tale khul khong mah a nana pot sam ding uh hia maw….
Historian, anthropologist leh science suidan in leng sawtlampek in mihingte mawl petmah ua inn gentak louh mei leng toh theilou in khul (leihawm) khong ah nana khosa uh, chi hi. Puan silhdan bang theilou in vuaktang in, nek ding theigah , singnah leh gamsate man in khosa lingling dan uh ahi. Hiai khong I sut-kulmut leh eikia khul a piang kichi a , kiminlohna dia zat pen dik khin khollou dia gintak na om thei tham ahi, pipute khul a pot ahi uh chih nial bel hihetlou napi in.
Titles under
HOME
[ About US ]
