Mumbai leh Mizoram tanpha ah damna deih hong zin uh
Saikot ah paitheilou 1 tel in damlou 5 in damna ngah nawn
Lamka, June 5: Chawilien Cancer Medicine Research Agency, Saikot ah damna deih in niteng in mi pung deuhdeuh a, Mumbai, Mizoram leh Senapati tanpha apan in leng damlou hong pai in tu in Agency lun petmah in om hi.

Sugnu Road a om Cancer Medicine Research Agency lunggulh in, Manipur phaizang District mun tuamtuam apan damlou hong kipua in, tuni (June 5) nitaklam dak 1 tan chauh in leng damlou mi 5 in damna ngah ua, damloute kipak thei mahmah uhi. Tuni a damna ngahte ahihleh,  Inaobi (38) s/o Khaidem, kum 8 paisa apan accident ziak in paralyse (zeng) gaivek hi. Zadni (50) of Arung Khunou, a sung ah dawi lut a, hawlkhiak in om hi. A cham (45) of Vongte Chiru TB in damlou a, huai in leng damna ngah a, Rokima of Ngopa, Mizoram a tha na a, huai in leng damna ngah in Raj Mohan (40) of Tokpaching leng zeng himahleh, damna ngah hi.

Mr Inaobi in agenna ah, kum 8 paisa in accident tuak a, huai apan a chi pum tangtheilou in om a, hun hong paitou zel in, chiangkhun khun kawm in pai kisin ahihdan Pressmen te kiang ah gen hi. Tu in bel Chawilien tungtawn in damna ngah ahihdan gen a, Halleluijah chi’n kikou a, a mah chauh kuamah let ngailou in pai gaugau hi. Damna lunggulh mipi tuni chauh in milip 10100 khawng paikhawm zou ding in tuat hi a, mi a tamluat ziak in, a batch batch in khenhial in om a, Chawilien in mipite adia thumsakna a neih zawh chiang in paisak zungzung in om uhi.

Lampi dung ah nidang in dawr buuk neu (stall) himhim om kei mah leh, tuni chiang in dawr a dim in om ta a, huai te ah leng cancer damdawi muh theih vek in om a, ann hotel tanpha om hi. Tuaban ah, dawr te ah item chi kim ki zuak a, vaite barap zuak leng a dim in om uhi. Huai a nasemtu khat in agenna ah, damdawi teh (leaves) te sum in suk ngai a, zinglam dak 4 apan nitak dak 12 tan bang su souhsouh mai uh ahihdan gen in, tulel in worker/steward 30-40 kikal in niteng in nna sem uh ahi chi hi.

Kiginni leh Seppatni in mipi tamdiak uh ahihdan vaisaite’n gen ua, hiai ministry February 2008 in kipan a, himahleh, April kha tawp apan mi tam hiaihiai in, tuni chiang in niteng in a tawm tawp in mi 8,000 pha gige ta ahi chi uhi. Amau’ agenbehna uah, a kipat tung apan tuni chiang in mihing Lakh 2 pha dek phial ding in hiai Chawilien Cancer Medicine Research Agency, Saikot vehta uh ahihdan gen in, damdawi leng a lunggulhte kiang ah piak in om ua, huai teng lak ah 40% bang in damna ngah ding ua lamet ahi chi uhi. Nikhat in atangpi in damdawi tui Litre 1,300 bang hawmkhiak zawh hi gige hi.  Hiai ministry a hong pichin hiaihiai tawh kiton in EFCI (Mission field), ICI (Mission field), Presbyterian leh Salvation army in kithuahpih uh hidanin leng vaisaite’n gen uhi. Makai khat in agenna ah, damna lunggulh ziak in Mumbai apan mikhat flight in hong leeng vengveng a, a ginna dampih in kiknawnta ahi chi hi.

Thusuak dang khat kizadan in Ngursanglur MLA in Research agency a zat ding in Sintex leh apoimawh dangdang piakding in chiam a, Dr Chaltonlien Amo Ex Minister in leng Government apan huhna bang om thei hiam chih thu tun ding hidanin kigen hi.