Vuite, Vuite Ham leh Vuite Hausate
Shmuel T.Kamkhawtuan, Manmasi Home
(Reproduced as Published in Tongluang Monthly Magazine, put up in this site just for purpose of archieving.)
Vuite: Thado, Zo Lusei, Vaiphei, Gange, etc. kichite beh leh phungmin ahi kei chih itheichiana, huaimah bangin, Vuite kichileng beh leh phungmin ahi keia, kuamah atuam hilo hi. Hansip Hausa, Pu Kamzamang Tuahchiang (1890-1935) hun apan tuni tannin Vuite kichi na kipaipihkhial khazek hidia gintakna a awm. Bangziakin? Thado, Zo, Lusei Vaiphei, Gangte, etc. akichih chiangin beh leh phungmin genna ahi keia, Group min ahi a, huai group sungah beh leh phung tuamtuam tampi akikhaikhawm, Huaimah bangin VUITE kichi leng, phun leh chiak hat(murmuring) chihna lam hiloin, khivui/Buhvui khat banga genteha awm, Vuiching khat chihna ahi a,VUITE kichi hi.Huai khivui ah beh leh phung tuamtuam tampi akikhil khawma, VUI khat aching, chihthu HI. Huaiziak in Pu Kamzamang elng amah kiain Vuite ahithei mawk keia, beh leh phung thu ah bel Tuahchiang ahi a, mi dangte leng beh leh phungmin tuamchiat neiin’huai khivui ah ava kikhilkhawm uh, chihna hi. Himahleh khivui khatah alaijanga akamtu tang liandeuh khat a awm naka, huaipen bel TUAHCHIANG behte ahihmanin , Pu Kamzamang in, Vuite Hausa pipen ka hi, achi theia, Hansip khua tutphah ahihmanin, akhua leng VUITE INNPI chih theimah suak hi. Simbeng chiatchiat tangzang kineih, chihbanga, Vuite kual atengte Vuite himahleuh, a simbeng tangzang dingin Tuahchiang Beh anan pangkha chihthu lel hi. Vuite kual sunga behteng khitang khat bangin la lechin, vuiching khat ah kihtang(khitang) 37 /38 vel a om akichi.
Vuite kual mah bangin kual dang mite’n leng group min khat ananeituam chiat ua, Pau leh Ham (Philogical group) dungjuiin group min tuamchiat ananei sam uh:
VUITE HAM:
Kual chihah ham Teddim Bial tuamzek akizang chiata, neukha khaakika chiat hi. Himahleh, atangpi’n bel akitheituah sim chiat, kiho mawhzen a awm kei. Thado kuala tengten Thado ham anazang ding ua, Zo kuala tengten Zo ham ana zang ding ua, Vuite kuala tengten Vuite ham anazang ding ua, Lusei , Gangte, Vaiphei, Hmar, etc. biala tengten a awmna gam uh ham in anaham mai ding uh. Himahleh, Lapau(Peotic word Language) lam ahbel, paukhat, lapau aneikhawm uh( muh dangah suichet ahi ding).
Hiai group minte beh leh phungmin ahihlouh dan hichibangin alangthei: 21st August, 1989, Pa Damzathang Munsong sih ni, Tuithapi khua a Pu Sahkhawlian Tuahchiang tawh kogelmai ka holimna uah, hiai agen: Vuite kichi lah isui suile, Teddim a Lamzang khua a hawng kipan ahi chi leltak unchin, Lamzang khua nakisatlo hileh , Vuite (Guite) kichi na awmlo ding bang maimah inchin; Ngaihte kichi lah isui suileh, singbul khat ahawng kipan ahi chi unchin, bang sing ahia ichih chiang alah agenthei awmlo zel, huci singbul na om thahahlo hileleng, ngaihte kichi omlo ding bang zel inchin’ huaiziakin; nui tatalh kawmin, tuan, nang ate(Manmasi) mah dikpen ding hi, hawitakin hon sui in, achi hi. Group min dangte leng suichian leng huchivek ding ahihmel theihloh hi.
VUITE HAMIN HIAITENG AHUAMKHA:
Lamzang Awphawi, Losau Awphawi, Dapzal Awiphai, Bukpi Awphawi, Teddim Awphawi, Ngennung Awiphawi, Khawthak Awphai, Val Awphawi, teizang Awphawi, Tuichiap Awphawi, leh Sihzang Awphawi. Huaibanah, Zo Awphawi leh Simte Awphawi leng Vuite Ham chih theihna a awmtho.
VUITE HAUSATE: Pu Kamzamang in 1929 kum a Hansip khua a suang aphuhna ah, Kamzamang Vuite Hausa pipen chi’n a gelha, adik. Himahleh , amah kia Vuite Hausa ahi chi a gelh ahi keia, Vuite kuala Vuite laka alianpen leh khawtam tutphah zo behte kahi uh, achihna ahizaw. Huaiziakin, Hansip Innpi tuh Vuite Innpi leng achih theihtho mah hi. Thado kual, Zokual, etcahleng beh leh phung lunpen khat chiat ana awmsam ua, huaiten khua tam ana tutphahzo ua, Hausa lianpen anasuak nak uh, huai bangbang ahi. Himahleh, tuahchiangte kia Vuite Hausa anahi kei ua, Vuite kualah Vuite Hausa in beh tuamtuam, phung tuamtuam ana awmsam uh: Vuite HAUSATE LEH VUITE HAM KHUATE:
· TUAHCHIANG(Phuaizang /Hiangjung); Hansip, Palkhuang, Aibulawn Songtal , Khuangin, Phaitong, Khazang, Mualpheng, lungchin, Haichin, Suangdoh, Ngaljang, tuimui, Suangbem, Pangmual, Kawlbem, Buangmun , Phaimual, Tongchin.
· Naulak: Bukpi, kaihlam, Matta Mualtam, Bungpilawn, Chiangpi.
· HAUZEL: Selam, Teikhang, Vaikhawtang, Zotang, Bungmual.
· TONSING: Tuithapi, Suangphuhmun, Pearsonmun, Dailawn.
· Haukip: Lungthul (T&K)
· Thangsing: Suangdai
· Buansing: B.Kalzang.
· Sianrhuam: Sialbu, Hiangtam Lamka, Takvom, Sinzawl.
· Valte; Zenhang Lamka, Lungthul (Enk)
· Vangteh : Tuimang
· Mangzo :Mualnuam(Ngawnbung), Kangkap.
· Tunglut: Munlian.
· Leivang: Behiang khawtung, Tuinuam, Lamzang, Lungthul(L). tangnuam.
· Vualnam: Lungthul (Enp), Savaipaih, Chingmun, Dawltang.
· Sawnna: Dialkhai
· Hangsing: Maukawt
· Munluah: Lungthul (D)
· Langel: Singmun (Assessed by TT Ginthang)
Vuite kuala kia hiloin, atung akhuate Vuite ham zatna khuate ahi ua, a Hausate uleng Vuite Hausate ngen ahi uh. Teddim bial ateng tawh lakkhawm le Vuite ten khua tam atutphah mahmah ding ua, Hausa leng a tam mahmah ding uh. Huaite lakah Tuahchiang(Phuaijang/Hiangjung) ten khua tam ana tutphah zopen ua, Vuite Hausate laka alianpen asuak uh. Himahleh , theihtuak khat tuh, Tuahchiang kia Vuite Hausa ahidek zenzen kei ua, atunga kigen beh 18te leng Vuite Hausa ahivek uh.
Huaiziakin kuamah kilaliantuam awm loa, beh min khawng leng namawk khek khekloin, mahni beh leh phungbingte I beh minmah napibawl in Hauzel in Hauzel, Tonsing in Tonsing, Tuahchiang in Tuahchiang, Sianthuam in Siamthuam, Munsong in Munsong, etc. mah chichiatin phung leh tang sial ngamin na om tiptep peuhleng. Vuite ihihlah akhiam kei dinga, I tawl dam dinga, I lakah kithutuahna leng aleng zawdeuh dingin agintakhuai, nachi kei maw? Theihsiamna in mi avak saka, mawlna in mi a mialsak.
