Athax KHOVEL EITE - Patt (cotton) toh kisai

PATT (COTTON) TOH KISAI:

15/07/2017

La pau ah patt akigen chiang in Patt bang neem, Patt bang saai khong kichi deuh hi. I pupate’n “TUAL PATT” ana chiinna uh hun tanglai pek hidia gintak ahi. Huchiin Patt chiing in amau ading puan mahni in tualsuak kibawl thei uhi. Patt toh kisai in amau ana genna uah “Patt in a min pukha diakkhol, zoh chih himhim omtheilou,(a bul) pat hi gige” or “Pat hi gige” ana chisek uhi. Huai tuh, patt nnasep ah azia a zaam tampi om a, nna khat I zoh chiang in adang khat patngai omzel chihna ahimai hi. Patt toh kisai nna khenkhat kikum zual veni:-

Patt Poii : Patt pen Pattlei hiam louma hiam ah pawi ngai a, alei a kibawl khit chiang in, pattang (patt chii) pen abiik in nupite’n pattlei hiam loulai hiam ah theh ua “Pattang theh” kichi hi.
Patt laak: Patt pen hong khang in pawllam chiang in hong pakpalh a huai chiang in, patt pakk kilou a huaituh “Patt La” kichi hi.
Patt Bua: Patt a kungh apan a kilaak chiang in a tangh toh kilakhawm (patt sunga atangh om ahihziak in) hiai patt, a tang toh kithuah pen “ A Bua ( read as bwa)” or “Patt Bua” kichi hi. Patt Bua pen nisa nuai ah hoihtak a phoukeu/gam poimoh hi; ahuchih ke’h patt lung in patt ana ne/susia nuam hi.
Pat hek: Patt Bua pen a tangh toh khenna di’n hek ngai hi. Patt pen “helhhawtt” zang in kihek hi.
Helhhawtt : Patt hek khawl pen “Helhhawtt” kichi hi. Helhhawtt van’ (parts) tuamtuam te (a) a kawm – a body chimai ni, (b) Helhhawtt tangh – a hekna gial ahi (c) a ban – a hekna kung , handle chimai ni (d) a tutna pekk khawng ahi. Patt hek ma in helhhawt pen a helhhawt gial sathu hoihtak a tat(nuh) a nisa nuai a phoulum(hailum) masak poimoh hi. Phoulum masak louh in helhhawt kipei(kihek) zoulou hi.
Patt Heksa: Pat bua pen helhhawtt in kihek a, a tangh kikhen hi. Patt a tangh toh khensa pen – “Patt Heksa” kichi hi.
Pattkapp: Patt heksa pen kap ngai hi. Patt pen “Patthal” or “Pattkapp” in kikap hi. Patkapp vante (a) a Peu (or gophel)- Gopi kung a kibawl ahi (b) a khau (c) a khau toh zop chiang suih khat & (d) a saina – gua phel kisui, a strummer ahimai. Hiai pattkapp zang in patt kikap neem/palh hi.
Pattot: Numeite’n Lohpi lehkhup in a phei tung ua koih in, lohpi pen puan za a tuam in, Pat kapsa bangzah hiam la ua; Lohpi tung a hual in sangoi bangbang tong khat tang bang in hual ua huaipen “Patttot” kichi hi. Pattot lohbup hiam Pattotbawm ah kikoih hi.
Patt kheek: Pattot pen khau hong suah na ding in kheek ngai hi. “Mui” zang in Patt kikheek a “Khau kheek” or “Patt kheek” kichi hi.
Mui: Patt apan khau suahna dia khaukheekna van(khawl) pen “Mui” kichi hi. Mui vante(parts)(a) A liim – (wheel) (b) a kungh (handle)- a liim peina dia a letna (c) akhuam – a liim kingakna (d) a phaw – muithal koihna frame sing a bawl (e) muibil – ching kual kiphan, muithal batna (f) Muithal – siktul dawnzum , patt khau kivelhna dia kibawl (g) Muikhau – a liim leh a muithal zopna (conveyor belt/string ). Muikhau ahih leh patt khau hual khuaigep a kijut vom ngeigei ahi. Muithal kaipeitu ahi.
Khautui : Khaukheksa muithal a kivial lum; a lai pawng a among lamtuak a dawn zum ahi ( a bobbin).
Khaukawn Baatna (Kawnkaa): Mau tongkhat leh akim vel a saua kila, a leek lam munkhat leh a bullam munkhat kivutvang. Huai a kivut vang na mun nihte a chiangtang( chiang suih pum) nih, khap nih vel a sau, a kimlai tan tum a kivaiphuh ahi ( double cross mah bang in). ”Kawnkaa” leng kichi abang.
Khaukawn: Khaukawn Baanna zang in khau a tui a omtuh a kawn kisuah hi.
Khauhuan: Pattpuan toutak bawlna ding in khaukawn bel in anngiam toh kihuan hi. Bangtan hiam kihuan zoh in or amin chiang in khauphouna khuam ah kiphou a nisa nuai ah kikeusak hi (“khauphou” kichi). Aphou sung in, khaukawn anngiam khong toh huan ahih ziak in, a kimat det louh na ding in khau hiathiat mai uhi. “Khauhiahna” kichi singgah khat oma, bang gah ahia chihbel, kon taklang theichet kei.
Suutlaam: Khau zialna van ahi a; khaukawn apan khaulim suahna vanzat ahi. Suutlaam vante(parts) (a) a kung – sing a kisui a bul toh kithuah a kitungtou ahi, (b) suutlaam lawng – gova tangkal khat hawi a kila, a tang apan anuailam sauzaw leh a tunglam tomzaw a kibal, a gomit tung a munli (4) kivut pailet ahi (c) a ban – gova ka kisui, suutlaam lawng a kiphei siat . A bang li(4) apha hi.
Khaulim : Suutlaam ban ah khaukawn kibang a, a khaumong suangtang ah kizial khum hi. Huchi a kawn khat bang a lim a zialkhiat ahih chiang in “khaulim” (sphere/ball) lianpi suak hi. Hiai khaulim pen siam a baan theih ahiphial ta. Himah leh siam a baat hial ma in “processing” bawl zek ngai maithei omlouthei.
Siambu: Siambu a vante (a) Duap – ching kiphan, (b) Chiampek (tumsing ahoih) (c) Kolka (2 apha) (d) Chianggelh (e) Chiangtangh (bangzah hiam apha) (f) Longpi (gokha khong ahi deuh) (g) Longzum (taal ahoih mahmah) (h) Khohthei (i) Tukkilh (saguh kisui) hiaite khawng ahi.
Siam : Khaulimte pota hiam lohneu hiam zang hial mah in siam in hon bang ua, Siam hon gat zoh chiang un tualpuan/ patpuan hong suak hi.

Hiai a kigen khalou puan gial/zem (rong) bawlna ding in tualsuak lou leh ai tuamtuam zang in bawlthei uhi. A Rong vom bawlna dia kizang tuh Mua-tui(Motui) akichi, mua hi sing (plant) khat ahi. A san bawlna leng forest product mah apan bawl theih akichi.

HELHHAWT LAPI:

1. Pu Von baanjaal, tulta lai laak,

Pahtaang ah sun naubang hongkap e;

Sunni ham taang kai hii-hiai e,

Momnou nau-oih zaila toh lawm sa’ng.

2. Theibang kase’n silhpuan ding aw,

Pahtaang ah sun naubang hong kap e;

Sunni ham taang kai jii-jiai aw,

Loubang ka tulpih silhpuan lawmnou hi chia.